Xa comezou o traballo de campo da Enquisa de Inserción Laboral 1990-2024, un estudo do Observatorio de Persoas Tituladas da UVigo que anima todos os antigos estudantes da UVigo a explicar a súa experiencia, profesional, académica e universitaria a partir dunha enquisa.
Accede ao cuestionario da enquisa
Esta nova actividade do Observatorio consiste nunha enquisa sobre a inserción laboral das persoas tituladas da UVigo desde o curso 1989/1990 ata o 2023/2024 e análise comparativa coa contorna profesional, empresarial, social e territorial. O estudo analiza o perfil académico dos antigos estudantes, a situación socio-laboral a 1 de xaneiro de 2025, as características do seu emprego, a valoración do traballo, a satisfacción co itinerario académico e coa inserción laboral, ben como o cumprimento das expectativas en relación co ensino superior.
Entre os meses de marzo e abril, máis de 117.846 antigos estudantes graduados en ciclos extinguidos (licenciaturas, diplomaturas, enxeñarías e enxeñarías técnicas), graos, mestrados e en programas de doutoramento que se graduaron nos últimos 35 anos terán a oportunidade de participar nesta enquisa online.
Trátase do segundo macroestudo que o Observatorio de Persoas Tituladas realiza aos antigos estudantes de todas as titulacións e promocións da UVigo. O primeiro, realizado no ano 2016, abarcou a inserción laboral das persoas tituladas entre 1990 e 2015; isto é, durante os primeiros 25 anos da UVigo. Pasados dez anos, queremos saber como foi a evolución da empregabilidade e como lle foi ás 35 promocións de egresados/as no mercado de traballo para poder comparar os resultados coa contorna profesional, empresarial, social e territorial.
O Observatorio de Persoas Tituladas realiza un seguimento das persoas tituladas a partir do estudo das súas traxectorias e da súa situación laboral. Deste xeito, a UVigo dispón dunha información actualizada, fiable e útil para a toma de decisións e a melloría da propia universidade. O informe sobre a inserción laboral das persoas tituladas da UVigo entre os cursos 1989/1990 e 2023/2024 permitirá obter os indicadores de empregabilidade actualizados do antigo estudantado universitario, de maneira que podan ser comparados cos da contorna socio-demográfica e económica no contexto galego, español e europeo.
Esta actividade conta co apoio e colaboración do Consello Social da Universidade de Vigo.